លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជាផងនោះបានប្រកាសប្ដូរជំហរថានឹងមិនបង្កើតឲ្យមានច្បាប់កំណត់ប្រធានគណបក្សសញ្ជាតិតែមួយ ដោយលោកអះអាងថា ដើម្បីបើកឱកាសឲ្យមានការចូលរួមពីអ្នកដែលមានសញ្ជាតិច្រើន។
លោក ហ៊ុន សែន បានប្រកាសបែបនេះនៅក្នុងពិធីរំឭកខួបទី៣៧ថ្ងៃ៧មករា ដែលប្រារព្ធធ្វើនៅស្នាក់ការកណ្ដាលរបស់គណបក្សប្រជាជនកម្ពុជាក្នុងខណ្ឌចំការមន។
លោក ហ៊ុន សែន មានប្រសាសន៍ថា កាលពីប៉ុន្មានថ្ងៃមុន លោកបានប្រកាសពីបំណងក្នុងការធ្វើវិសោធនកម្មច្បាប់ស្ដីពីគណបក្សនយោបាយ ដោយកំណត់ឲ្យប្រធានគណបក្សមានសញ្ជាតិតែមួយ។ ទោះយ៉ាងណា លោកបន្តថា ក្រោយពីមានការត្រិះរិះពិចារណាក្នុងចំណោមថ្នាក់ដឹកនាំគណបក្ស គណបក្សប្រជាជនកម្ពុជាសម្រេចស្វាគមន៍អ្នកដែលមានសញ្ជាតិច្រើនឲ្យចូលរួមប្រកួតប្រជែងក្នុងការបោះឆ្នោត៕
