មាឃបូជា គឺជាពិធីបុណ្យដ៏សំខាន់មួយនៅក្នុងបណ្ដាប្រទេសដែលជាអ្នកកាន់នូវព្រះពុទ្ធសាសនា បច្ចុប្បន្នប្រទេសកម្ពុជា ក៏បានយកថ្ងៃនៃពិធីបុណ្យនេះ សម្រាប់ជាថ្ងៃឈប់សម្រាករបស់បុគ្គលិក កម្មករ មន្ត្រីរាជការទូទាំងប្រទេសផងដែរ ព្រោះប្រទេសកម្ពុជា បានយកសាសនាព្រះពុទ្ធ គឺជាសាសនារបស់រដ្ឋ ដែលមានចែងនៅក្នុងច្បាប់រដ្ឋធម្មនុញ្ញ មាត្រា ៤៣ តែយ៉ាងណាមិញ ប្រជាជនខ្លះ ជាពិសេសយុវជនកម្ពុជាសព្វថ្ងៃនេះតែម្ដង នូវពុំទាន់យល់ដឹងអំពីហេតុនៃពិធីបុណ្យនេះនៅឡើយ ហើយក៏មិនទាន់ដឹងថា ពិធីបុណ្យនេះបានផ្ដល់ផលប្រយោជន៍អ្វីខ្លះសម្រាប់ខ្លួនឯងដែរ។
ឆ្លៀតក្នុងឱកាសនៃពិធីបុណ្យមាឃបូជា បានខិតជិតមកដល់ក្នុងពេលឆាប់ៗខាងមុខនេះ គឺនៅថ្ងៃទី២២ ខែកុម្ភៈ ឆ្នាំ២០១៦ ត្រូវជាថ្ងៃ ១៥កើត ពេញបូណ៌មី ខែមាឃ ឆ្នាំមមែ សប្ដស័ក ព.ស ២៥៥៩ ដែលជាថ្ងៃខែឆ្នាំខ្មែរ ប៉ុន្តែយុវជនយើងខ្លះលែងចេះរាប់អស់ហើយ មិនដឹងថាមកពីមូលហេតុអ្វី? តែជាមហាកិត្តិយសមួយដែរ ថ្ងៃនេះគេហទំព័រព័ត៌មាន Kqube.net បាននិមន្តព្រះភិក្ខុមុនិបាលោ ជួន កក្កដា ធម្មកថិកដ៏ល្បីឈ្មោះ ផ្នែកសម្ដែងធម៌អប់រំបែបព្រះពុទ្ធសាសនា មកស្រាយបំភ្លឺអំពីបុព្វហេតុនៃការប្រារព្ធធ្វើពិធីបុណ្យមាឃបូជា និងសារៈសំខាន់ផ្សេងៗទៀតដែលពលរដ្ឋខ្មែរត្រូវតែយល់ដឹងបន្ថែមផងដែរ។
ចំណុចពិសេសមួយដែលព្រះភិក្ខុ ជួន កក្កដា បានលើកបំភ្លឺឡើង ដើម្បីឲ្យប្រជាជនខ្មែរភ្ញាក់រលឹកឡើងវិញថា ពិធីបុណ្យមាឃបូជានេះ មិនមែនធ្វើឡើងចំពោះតែលោកយាយលោកតាចាស់ៗនោះទេ គឺត្រូវតែមានការចូលរួម យល់ដឹងឲ្យបានគ្រប់ៗគ្នា ព្រោះច្បាប់រដ្ឋគេបានយកថ្ងៃនៃពិធីបុណ្យមាឃបូជានេះ ជាថ្ងៃឈប់សម្រាកទូទាំងប្រទេស ចុះហេតុអ្វីពលរដ្ឋខ្មែរ មិនស្វែងយល់អំពីពិធីបុណ្យនេះឲ្យកាន់តែច្បាស់គ្រប់ៗគ្នា ចាំអីតែលោកតាលោកយាយ គឺយុវជនត្រូវតែជាអ្នកដឹកនាំ ឬយល់ដឹងឲ្យបានច្រើនគ្នាអំពីបុណ្យជាតិរបស់ខ្លួនឯង កុំនាំគ្នាដឹងតែបុណ្យនៃក្ដីស្រលាញ់ ឬបុណ្យជាតិសាសន៍ដទៃនោះ។
លោកម្ចាស់គ្រូអង្គនេះមានថេរដីកាបន្ថែមថា សព្វថ្ងៃនេះបើពុំមានការអប់រំបែបព្រះពុទ្ធសាសនា ដើម្បីឲ្យមនុស្សទូទៅចេះខ្លាចបុណ្យបាប គុណទោសនោះទេ ម្ល៉ោះហើយមនុស្សម្នាក់ៗគ្មានអ្នកណាម្នាក់មានគុណធម៌ក្នុងខ្លួននោះទេ ហើយបើនៅក្នុងសង្គម ឬប្រទេសមួយមិនសាសនាថែមទៀត គឺធ្វើឲ្យប្រទេសនោះ មិនមានសុខសន្តិភាពសោះឡើយ យ៉ាងណាមិញប្រទេសកម្ពុជាក្នុងប្រវត្តិសាស្ត្រនាពេលកន្លងមក ខណៈដែលព្រះពុទ្ធសាសនា ត្រូវបានគេលុបបំបាត់ តើកាលនោះប្រជាជនខ្មែរទៅជាយ៉ាងណា ពលរដ្ឋខ្មែរពិតជានូវចាំមិនភ្លេចទេ? ហេតុទាំងអស់នេះហើយ ទើបបញ្ជាក់ថា ព្រះពុទ្ធសាសនា ពិតជាមានគុណណាស់សម្រាប់អ្នកគោរពកាន់សាសនានេះ។
