ភ្នំពេញ៖ ក្រុមហ៊ុនផ្តល់សេវាទូរស័ព្ទ Metfone បានទិញយកអាជ្ញាប័ណ្ណនិងទ្រព្យសម្បត្តិរបស់ក្រុមហ៊ុនផ្តល់សេវា ទូរស័ព្ទ Beeline ដែលជាក្រុមហ៊ុនផ្តល់សេវាទូរស័ព្ទធំទី ៤ នៅកម្ពុជា។ នេះបើតាមសេចក្តីប្រកាសព័ត៌មានដែលមិនបានបញ្ជាក់ពីទំហំទឹកប្រាក់ មួយចេញផ្សាយដោយក្រុមហ៊ុន Beeline កាលពីម្សិលមិញ។
ការលក់អាជ្ញាប័ណ្ណនិងទ្រព្យសម្បត្តិក្រុមហ៊ុន Sotelco Ltd ដែលជាម្ចាស់ Beeline នឹងដកប្រតិបត្តិការផ្តល់សេវាទូរស័ព្ទរបស់ខ្លួនទាំងអស់ ព្រមទាំងលុបចោលការភ្ជាប់បណ្តាញរបស់អ្នកប្រើប្រាស់ទាំងអស់ បន្ទាប់ពីបានលក់អាជ្ញាប័ណ្ណនិងទ្រព្យសម្បត្តិរបស់ខ្លួនទៅឲ្យ ក្រុមហ៊ុន ផ្តល់សេវាទូរស័ព្ទ Metfone ដែលការលក់នេះធ្វើឡើងជាផ្លូវការណ៍កាលពីថ្ងៃទី ១១ ខែមីនា។
សេចក្តីប្រកាសនេះបានបន្តថា អ្នកភ្ជាប់បណ្តាញប្រើប្រាស់របស់ក្រុមហ៊ុន Beeline នឹងផ្ទេរទៅកាន់បណ្តាញទូរស័ព្ទរបស់ក្រុមហ៊ុន Metfone ដោយស្វ័យប្រវត្តិ ដោយអ្នកប្រើប្រាស់នឹងត្រូវផ្លាស់ប្តូរស៊ីមទូរស័ព្ទរបស់ Beeline ទៅប្រើប្រាស់ ស៊ីមទូរស័ព្ទរបស់ Metfone វិញ។
សេចក្តីប្រកាសព័ត៌មាននោះសរសេរថា៖ «ចាប់ពី ថ្ងៃទី២៤ ខែមីនា តទៅ អ្នកប្រើប្រាស់បណ្តាញទូរស័ព្ទBeeline នឹងត្រូវឈប់បញ្ជូលទឹកប្រាក់ក្នុងទូរស័ព្ទតាមរយៈកាតកោសរបស់ ក្រុមហ៊ុន Beeline ទៀត។ អ្នកប្រើប្រាស់និងត្រូវផ្លាស់ទៅប្រើស៊ីមកាតរបស់ក្រុមហ៊ុន Metfone វិញ ហើយអាចបញ្ជូលទឹកប្រាក់តាមរយៈ កាតកោសរបស់ក្រុមហ៊ុន Metfone ដែលមានលក់នៅទូទាំងប្រទេសកម្ពុជា»។
អ្នកប្រើប្រាស់ដែលបានជាវកាតកោសរបស់ Beeline នឹងត្រូវប្រើឲ្យបានមុនថ្ងៃទី ២៤ ខែមីនា ហើយអ្នកចែកចាយកាតកោសនិងស៊ីមទូរស័ព្ទរបស់ Beeline ដែលនៅមិនទាន់បានប្រើប្រាស់ត្រូវបានណែនាំឲ្យទាក់ទងទៅក្រុមហ៊ុន ។
លោក Anthony Galliano អគ្គនាយកក្រុមហ៊ុន Covenantim International and Cambodian Investment Management ថ្លែងកាលពីម្សិលមិញថា កិច្ចព្រមព្រៀងទិញលក់នេះនឹងផ្តល់ប្រយោជន៍សម្រាប់ក្រុមហ៊ុនទាំង ពីរ ដោយក្រុមហ៊ុន Metfone តាមរយៈការទិញទ្រព្យសម្បតិ្តដូចជា ហ្វ្រេកង់ អង់តែនបណ្តាញទូរស័ព្ទនិងអាជ្ញាប័ណ្ណដែលមានស្រាប់ ខណៈចំនួនអ្នកប្រើប្រាស់របស់ Beeline មិនមានចំនួនច្រើនដែលគួរឲ្យកត់សម្គាល់ក៏ដោយ។
លោកថ្លែងថា៖ «ខ្ញុំគិតថា ប្រសិនបើអ្នកមើលលើកិច្ចព្រមព្រៀងទិញលក់នេះ គឺវាមិនបានសំដៅលើចំនួនអ្នកប្រើប្រាស់នោះទេ គឺទ្រព្យសម្បតិ្តរបស់ក្រុមហ៊ុន Beeline ទៅវិញទេ ដែលក្រុមហ៊ុន Metfone ចង់បាន»។
លោកបន្ថែមថា អ្នកប្រើប្រាស់បណ្តាញទូរស័ព្ទ Beeline នឹងទទួលសេវាប្រសើរជាងមុនតាមរយៈការពង្រីកបណ្តាញសេវារបស់ក្រុមហ៊ុន របស់ក្រុមហ៊ុន Metfone រួមមានសេវាអ៊ីនធឺណេតល្បឿនលឿន 4G ជាដើម។ ទោះជាយ៉ាងណា ការផ្លាស់ប្តូរស៊ីមកាតអាចជារឿងដែលមិនងាយស្រួលសម្រាប់អតិថិជន។
របាយការណ៍អំពីទូរគមនាគមន៍ចេញផ្សាយកាលពីខែ កក្កដា ឆ្នាំមុន ដោយក្រុមហ៊ុន BuddeComm បង្ហាញថាក្រុមហ៊ុន Beeline មានកំណើនអ្នកចុះឈ្មោះប្រើប្រាស់បណ្តាញរបស់ខ្លួនរហូតដល់ ១លាន ១ សែននាក់ក្នុងឆ្នាំ២០១២ តែចំនួននេះបានថយចុះនៅត្រឹម ៦ សែននាក់ ៦ខែក្រោយមក។ គិតត្រឹមចុងឆ្នាំ ២០១៣ តួលេខនេះបានធ្លាក់ចុះមកត្រឹម ៥ សែននាក់។
គួរបញ្ជាក់ថា កាលពីឆ្នាំ ២០១៣ ឧកញ្ញ៉ា ហួត វណ្ណថន បានទិញភាគហ៊ុន ៩០ ភាគរយនៅក្រុមហ៊ុន Beeline ពីក្រុមហ៊ុនរស្ស៊ី Vimplecom បន្ទាប់មកបានទិញភាគហ៊ុននៅសល់ ១០ ភាគរយទៀត ដើម្បីក្លាយជាម្ចាស់ក្រុមហ៊ុនពេញសិទ្ធ។
ទទួលបានអាជ្ញាប័ណ្ណនៅក្នុងឆ្នាំ ២០០៦ ដើម្បីប្រតិ្តបត្តិនៅកម្ពុជា ក្រុមហ៊ុន Metfone ដំណើរការដោយក្រុមហ៊ុន Viettel (Cambodia) ជាក្រុមហ៊ុនដែលគ្រប់គ្រងដោយយោធារបស់វៀតណាម បានចាប់ផ្តើមដំណើរការនៅកម្ពុជានៅឆ្នាំ ២០០៩។
គិតត្រឹមឆ្នាំ ២០១៣ ក្រុមហ៊ុននេះជាក្រុមហ៊ុនឈានមុនគេដោយទទួលបានអ្នកប្រើប្រាស់ បណ្តាញរបស់ខ្លួនរហូតដល់ ៩,៧ លាននាក់ ជាមួយអ្នកប្រើប្រាស់ក្រោម ១ លាននាក់ប្រើប្រាស់សេវាអ៊ីនធឺណេត 3G ។
បុគ្គិលិកក្រុមហ៊ុន Metfone បានបដិសេធមិនធ្វើអត្ថធិប្បាយលើការទិញលក់នេះ ខណៈនាយកគ្រប់គ្រងសាខារបស់ក្រុមហ៊ុន Beeline សុំមិនធ្វើអត្ថធិប្បាយដោយលើកឡើងថា មិនមានតួនាទីលើការទិញលក់នេះ៕