moon OS ជាប្រព័ន្ធប្រតិបត្តិការ របស់កូនខ្មែរ

ជុំវិញ​ការ​ដាក់​ឈ្មោះ​ប្រព័ន្ធ​ប្រតិបត្តិការ​ខ្មែរ moon OS ត្រូវ​បាន​ម្ចាស់​ស្ថាបនិក​ធីម ច័ន្ទឬទ្ធី​ពន្យល់​ថា គឺ​ដោយ​យោង​ទៅ​តាម​ឈ្មោះ​របស់​គេ ច័ន្ទ (ធីម ច័ន្ទ​ឬទ្ធី) ដែល​មាន​ន័យ​ថា​ព្រះច័ន្ទ​ ទើប​គេ​សម្រេច​ចិត្ត​ដាក់​ឈ្មោះ​ប្រព័ន្ធ​ប្រតិបត្តិការ​ដែល​គេ​បង្កើត​ថា moon OS។

“ដំបូង​គិត​ដែរ ប៉ុន្តែ​នឹក​មិន​ឃើញ​មិន​ដឹង​ដាក់​ឈ្មោះ​អី​សម រួច​ក៏​នឹក​ឃើញ​ឈ្មោះ​ខ្លួន​ឯង​ទើប​សម្រេច​ដាក់​ឈ្មោះ moon OS តែ​ម្តង​ទៅ”។

យុវជន​រូប​នេះ​បញ្ជាក់​ថា moon OS បន្ទាប់​ពី​ដាក់​ឲ្យ​ប្រើប្រាស់​មាន​ការ​ចាប់​អារម្មណ៍​ជា​ច្រើន ជាពិសេស​អ្នក​ប្រើប្រាស់​នៅ​ក្រៅ​ប្រទេស។

moon OS ជា​ប្រព័ន្ធ​ប្រតិបត្តិ​ការ​លីនុច​មួយ ដែល​មាន​មុខងារ​ប្រើប្រាស់​ស្រដៀង​ប្រព័ន្ធ​ប្រតិបត្តិការ Windows របស់ Microsoft។ moon OSត្រូវ​បាន​បង្កើត​តាំង​ពី​ឆ្នាំ ២០០៨ ដោយ​យក Ubuntu មក​ធ្វើ​ជា​មូលដ្ឋាន​ក្នុង​ការ​បង្កើត។ moonOS ជា​កូដ​ចំហ​ អាច​ទាញ​ប្រើប្រាស់​ដោយ​សេរី គិត​មក​ទល់​ពេលនេះ moon OS បាន​អភិវឌ្ឍ​បាន ៤ ជំនាន់​មក​ហើយ។