ឥណ្ឌូនេស៊ីចេញច្បាប់ហាមដល់កំលោះក្រមុំជិះម៉ូតូរួមគ្នាតែមួយ
ក្រុងបានដាអាសេ: មេធាវីម្នាក់បាននិយាយកាលពីថ្ងៃចន្ទថា ស្រុកមួយនៅក្នុងខេត្ដអាសេប្រទេសឥណ្ឌូនេស៊ីបានអនុម័តច្បាប់ដោយបានហាមប្រាមបុរស និងនារីនៅលីវមិនឲ្យជិះម៉ូតូរួមគ្នាជានិយតកម្មថ្មីចុងក្រោយរបស់រដ្ឋអ៊ិស្លាមក្នុងខេត្ដអភិរក្សមួយនេះ។
លោកមេធាវី ហ៊្វូហ្សាន ហាមហ្សា បាននិយាយថា សមាជិកសភាក្នុងស្រុកអាសេខាងជើង កាលពីសប្ដាហ៍មុន បានអនុម័តច្បាប់ដែលនឹងចូលជាធរមានរយៈពេលមួយឆ្នាំ។ អាជ្ញាធរខិតខំអនុវត្ដច្បាប់រដ្ឋអ៊ិស្លាមឲ្យបានពេញទំហឹង។
លោក ហាមហ្សា បានប្រាប់ AFP ថា៖ «អ្នកនៅលីវអង្គុយជាប់គ្នាលើម៉ូតូតែមួយពិតជាប្រឆាំងច្បាប់រដ្ឋអ៊ិស្លាមដែលនាំឲ្យប្រព្រឹត្ដអំពើបាប»។
អាសេ ស្ថិតនៅកំពូលកោះស៊ូម៉ាត្រាភាគខាងជើង ជាខេត្ដតែមួយគត់ក្នុងប្រទេសដែលមានប្រជាជនមូស្លីមច្រើនបំផុតក្នុងលោកដែលអនុញ្ញាតឲ្យអនុវត្ដច្បាប់រដ្ឋអ៊ិស្លាម ហើយការរួមភេទខ្ទើយ លេងល្បែងស៊ីសង និងផឹកគ្រឿងស្រវឹងត្រូវដាក់ទោសដោយការវាយនឹងរំពាត់។
ខេត្ដអាសេចាប់ផ្ដើមអនុវត្ដច្បាប់រដ្ឋអ៊ិស្លាមក្រោយពីទទួលសិទ្ធិស្វ័យភាពពិសេសក្នុងឆ្នាំ ២០០១ ជាកិច្ចខិតខំដោយរដ្ឋាភិបាលក្រុងហ្សាការតាដើម្បីបង្ក្រាបកុបកម្មផ្ដាច់ខ្លួនដ៏រ៉ាំរ៉ៃ។
វិធានការចុងក្រោយក្នុងការហាមប្រាមអ្នកជិះម៉ូតូរួមគ្នា ដែលនឹងប៉ះពាល់ដល់មនុស្ស ៥០ ម៉ឺននាក់នៅស្រុកអាសេខាងជើង ក្រោយពីទីក្រុងមួយនៅក្នុងខេត្ដអាសេ កាលពីឆ្នាំ ២០១៣ ក៏បានហាមស្ដ្រីមិនឲ្យជិះម៉ូតូកន្ធែកជើងដូចបុរស ដោយតម្រូវឲ្យពួកគេជិះអង្គុយចំហៀងវិញ៕ HR