កាមេរ៉ា ១២មេហ្គាភិចហ្សេលនៅលើ iPhone 6S ថ្មីនេះ នឹងប្រើបច្ចេកវិទ្យា RGBW Coding របស់ក្រុមហ៊ុន Sony ដែលត្រូវបានឌីហ្សាញផ្ដល់កម្រិតគុណភាពរូបថតខ្ពស់ ច្បាស់ល្អបើទោះបី ថតរូបនៅទីងងឹតក៏ដោយ។ ក្រៅពីសមត្ថភាពកាមេរ៉ាខ្ពស់ជាងមុនហើយ iPhone 6S ក៏ត្រូវគេរំពឹងទៀតថា នឹងបំពាក់អង្គប្រតិបត្តិថ្មី Apple A9 ជាមួយ RAM ទំហំធំជាងមុន ពោលគឺទំហំ 2GB។ Apple ថែមទាំងត្រូវគេរំពឹងទៀតថា ក្រុមហ៊ុននឹងរក្សារចនាបថ iPhone 6S/6S Plus ដូចជា iPhone 6/6 Plus។ Apple អាចនឹងឌីហ្សាញរូបរាងថ្មីជាងនេះ យ៉ាងហោចនៅឆ្នាំ២០១៦ ក្រោយ។
iPhone 6S/6S Plus នឹងមានជម្រើសពណ៌ថ្មីថែមទៀតដែលជាពណ៌មាសក្រហម (Rose Gold) ដូចនៅលើនាឡិកា Apple Watch ដែរ។ ចំណែកប៊ូតុង Home ដែលភ្ជាប់ sensor ស្កេនក្រយៅដៃក៏នឹងមានការអភិវឌ្ឍដំណើរការល្អជាងមុនផងដែរ។
iPhone 6S ត្រូវគេរំពឹងថា អាចនឹងត្រូវ Apple ប្រកាសចេញនៅក្នុងសន្និសីទកាសែតនៅអំឡុងខែសីហា ខាងមុខ លឿនជាងកាលបរិច្ឆេទប្រកាស iPhone ជំនាន់ៗមុននៅអំឡុងខែកញ្ញា៕