ប្រភព៖ BBC
ក្នុងចំណោមមេដឹកនាំទាំងអស់នៅទូទាំងពិភពលោក គេឃើញប្រធានាធិបតីកូរ៉េខាងជើង នៅពេលដែលលោកអញ្ជើញទៅទីណាមួយ មន្ត្រីជាន់ខ្ពស់ ឬគណៈប្រតិភូដែលអមដំណើរលោក តែងមានសៀវភៅ និងប៊ិចសម្រាប់កត់ត្រាពាក្យសម្ដីដែលលោកមានប្រសាសន៍។ ការស្ដាប់លោកមានប្រសាសន៍ដោយមិនមានអ្វីសម្រាប់កត់ត្រានៅក្នុងដៃ នឹងធ្វើឲ្យលោក គីមជុងអ៊ុន ទទួលអារម្មណ៍ថា ពាក្យសម្ដីរបស់លោកមិនសូវមានតម្លៃ បានត្រឹមតែគេស្ដាប់ចោល។
សូមកុំភ្លេចថារដ្ឋមន្ត្រីក្រសួងការពារជាតិទើបតែត្រូវបានប្រហារជីវិតថ្មីៗដោយសារតែខ្វះការយកចិត្តទុកដាក់ចំពោះសម្ដីលោកគីមជុងអ៊ុន ព្រោះនៅក្នុងអង្គប្រជុំមួយ លោករដ្ឋមន្ត្រីរូបនោះបានគេងនៅលើតុ។ អ្នកវិភាគយល់ថានៅចំពោះមុខម៉ាស៊ីនថត និងកាមេរ៉ា លោកគីមជុងអ៊ុនចង់ឲ្យថតរូបលោកមានមន្ត្រីរដ្ឋាភិបាលបង្ហាញសេចក្ដីគោរពចំពោះលោក ហើយកត់ត្រាពាក្យសម្ដីសំខាន់ៗ។
យោងតាមលោកសាស្ត្រាចារ្យ Steve Tsang បង្រៀននៅសាកលវិទ្យាល័យ Notingham អ្នកដែលកាន់សៀវភៅសម្រាប់ធ្វើកំណត់ហេតុផ្សេងៗ ត្រូវតែកត់ត្រាអនុសាសន៍ផ្សេងៗរបស់ប្រធានាធិបតីគីមជុងអ៊ុន ដោយប្រិតប្រៀង និងម៉ត់ចត់បំផុត កុំលេងសើចឲ្យសោះជាមួយមេដឹកនាំវ័យក្មេងរូបនេះ។
ឧទាហរណ៍ ចំណុចរសើបដូចជាពាក់ព័ន្ធនឹងវិស័យនយោបាយជាដើម អស់លោកទាំងនោះប្រយ័ត្នប្រយែងណាស់ ហើយបើអាចជៀសវាងបាន គឺ អស់លោកសូមប្រាថ្នាកុំឲ្យជួបឲ្យសោះ ព្រោះវាពោរពេញដោយគ្រោះថ្នាក់ពន់ពេក តិចលោតែសរសេរខុសត្រង់ចំណុចណាមួយ ប្រាកដជាមានរឿងធំជាមិនខាន។
សំណេរផ្សេងៗនៅក្នុងសៀវភៅកំណត់ហេតុទាំងនោះត្រូវបានរក្សាទុកជាឯកសារលាក់ការណ៍ផ្ទៃក្នុង (confidential) ហើយមិនផ្សព្វផ្សាយជាសាធារណៈជាដាច់ខាត។ ក្រសួងឃោសនាការ (propaganda) នឹងយកកំណត់ត្រាទាំងនោះទៅពិនិត្យមើល។ ពាក្យពេចន៍ឃ្លោងឃ្លាណាដែលល្អ ក្រសួងនឹងយកទៅប្រើប្រាស់សម្រាប់បម្រើឲ្យនយោបាយរបស់រដ្ឋាភិបាលកូរ៉េខាងត្បូង៕