តើការរួមភេទអំឡុងពេលមានគភ៌មានសុវត្ថិភាពដែរឬទេ?
យោងតាមការចុះផ្សាយរបស់ក្រុមប្រឹក្សាផ្ដល់យោបល់ផ្នែកសម្ភព និងទារករបស់វេបសាយ BabyCenter ស្ត្រីមានគភ៌ និងមានសុខភាពប្រក្រតីអាចបន្តការរួមភេទចាប់តាំងពីខែដំបូងរហូត ដល់បែកទឹកភ្លោះចូលបន្ទប់សម្រាលកូន។ ការរួមភេទមិនធ្វើឲ្យប៉ះពាល់ដល់ទារកក្នុងផ្ទៃទេ ព្រោះទារកក្នុងស្រោម ត្រូវបានការពារដោយសាច់ដុំស្បូន និងមាត់ស្បូនពីលិង្គដែលស៊កចូលទ្វារមាស។
បើទោះជាការរួមភេទឈានដល់ចំណុចកំពូលអាចធ្វើឲ្យស្បូនកន្ត្រាក់ ក៏ពិតមែន ប៉ុន្តែវាជាចលនាមួយរយៈខ្លី និងមិនមានផលប៉ះពាល់អ្វីទេ។
ក្នុងករណីខ្លះដូចជាទងសុកស្ថិតនៅក្បែរមាត់ស្បួន បញ្ហាធ្លាក់ឈាម ស្បូនខ្សោយ មាត់ស្បូនមិនសូវខ្ជឹប ឬក៏ប្រវត្តិធ្លាប់រលូតកូនជាដើមនោះ ពេទ្យឆ្មបអាចណែនាំឲ្យអ្នកផ្អាកសកម្មភាពរួមភេទ។
តើវាខុសគ្នាដូចម្ដេចរវាងការរួមភេទធម្មតា និងពេលមានគភ៌?
ស្ត្រីជាច្រើនមានអារម្មណ៍ខុសគ្នា។ ស្ត្រីខ្លះយល់ថាការរួមភេទអំឡុងពេលមានគភ៌ពោរពេញដោយភាពស្រើបស្រាល រីឯខ្លះទៀតបែរជាមានកម្រិតចំណង់ផ្លូវភេទធ្លាក់ចុះទៅវិញ។
អ្វីដែលធ្វើឲ្យស្ត្រីមានគភ៌ទទួលបានភាពស្រណុកស្រួលពេលរួមភេទ នោះគឺដោយសារលំហូរឈាមទៅកាន់តំបន់ត្រគាក ធ្វើឲ្យប្រដាប់ភេទរីកធំ ងាយនឹងមានរំញោចសម្រើបនៅពេលដែលមានការបបោសអង្អែល។ អំឡុងពេលមានគភ៌ទឹករអិលរបស់ស្ត្រីមានច្រើន ដែលរឹតតែអំណោយផលដល់ការរួមភេទ។
ផ្ទុយទៅវិញ ស្ត្រីឯទៀតបែរជាមិនចូលចិត្តស្ថានភាពនេះ។ ការរីកប្រដាប់ភេទ និងឡើងសុដន់អាចធ្វើឲ្យពួកនាងមានអារម្មណ៍ឈឺ។ នៅពេលប្រតិបត្តិការសិច នាងអាចមានអាការចុកពោះ ដែលធ្វើឲ្យការរួមភេទមិនស្រួលដូចពីមុន។
តើការអស់ចំណង់ផ្លូវភេទពេលមានគភ៌ជារឿងធម្មតាឬ?
ស្ត្រីម្នាក់ៗមានអារម្មណ៍ខុសគ្នា។ ស្ត្រីខ្លះមានចំណង់ផ្លូវភេទឡើងចុះ មិនទៀងទាត់ក្នុងអំឡុងពេលមានគភ៌៩ខែ។ ជួនកាលនាងមានអារម្មណ៍ស្រើបស្រាល និងជួនកាលទៀតនាងក៏អស់ចំណង់។ ផ្ទុយទៅវិញស្ត្រីខ្លះមានអារម្មណ៍ថានាងចូលចិត្តរួមភេទពេលមានគភ៌ ខណៈដែលស្ត្រីផ្សេងទៀតបិទទ្វារមាសមិនស្វាគមន៍ដៃគូតាំងពីដើមខែ ដល់ថ្ងៃសម្រាល។
វាមិនជាបញ្ហាអ្វីចម្លែកទេ ព្រោះស្ត្រីភាគច្រើនមាន អារម្មណ៍ឆេវឆាវ ហត់នឿយ និងចាញ់កូនដែលធ្វើឲ្យនាងលែងនឹកនាដល់រឿងលើគ្រែ ពិសេសនៅត្រីមាសដំបូងតែម្ដង។
ចុះចំណង់ផ្លូវភេទរបស់បុរសអាចប្រែប្រួលតាមដៃគូដែរឬទេ?
បុរសក៏ដូចគ្នា។ អ្នកខ្លះនៅតែចង់រួមភេទជាមួយដៃគូទោះជាអំឡុងពេលនាងមានគភ៌ រីឯអ្នកខ្លះទៀតហាក់បាត់បង់ចំណង់ពេលដែលឃើញពោះស្ត្រីជាដៃគូ កាន់តែធំ។
កត្តាផ្លូវចិត្ត ការមិនទាន់ត្រៀមខ្លួនធ្វើជាឪពុកគេ និងកង្វល់ខ្លាចប៉ះពាល់ដល់ទារកក្នុងផ្ទៃអាចធ្វើឲ្យបុរសរារែក ឬអស់អារម្មណ៍ក្នុងការរួមភេទអំឡុងពេលមានគភ៌ផងដែរ។
តើការសម្រេចកាមដោយប្រើមាត់អាចជាបញ្ហាចោទដែរឬទេ?
ការផ្ដល់អារម្មណ៍ស្រណុកស្រួលដល់ស្ត្រីមានគភ៌ដោយប្រើមាត់លិទ្ធ មាត់ទ្វារមាសរបស់នាងមិនមានផលប៉ះពាល់អ្វីទេ ដរាបណាបុរសនោះ មិនផ្លុំខ្យល់ចូលក្នុងយោនីរបស់នាង។ គ្រោះថ្នាក់បណ្ដាលមកពីខ្យល់ចូលក្នុងឈាមអាចកើតឡើងដោយចៃនដ្យ ធ្វើឲ្យប៉ះពាល់ដល់ជីវិតម្ដាយ និងទារកក្នុងផ្ទៃផងដែរ។
ករណីមួយទៀត ប្រសិនបើបុរសនោះមានមេរោគក្នុងមាត់ ការធ្វើអូរ៉ាល់សិចគួរតែផ្អាក។
ក្នុងករណីដែលស្ត្រីមានគភ៌ចង់ផ្ដល់ភាពស្រណុកសុខស្រួលដល់ភាគី ខាងបុរសវិញ នាងគួរតែគិតគូរកត្តាជំងឺឆ្លងបណ្ដាលមកពីមេរោគ ឬទឹកកាមរបស់បុរសនោះផងដែរ។
តើការរួមភេទពេលមានគភ៌ត្រូវប្រើក្បាច់អ្វីដែរទើបល្អ?
ក្បាច់ និងកាយវិការគឺអាស្រ័យលើការចរចារវាងដៃគូទាំងសងខាង។ ប៉ុន្តែចំណុចរួមមួយគឺពេលរួមភេទក្បាច់ និងកាយវិការត្រូវមានលក្ខណៈទន់ភ្លន់។ ពេលគភ៌កាន់តែធំ ការរួមភេទគួរតែតម្រូវឲ្យស្រីនៅពីលើបុរសទើបជាការប្រសើរ។
តើអាការសម្គាល់អ្វីខ្លះដែលអ្នកគួរតែទៅជួបគ្រូពេទ្យ?
ការឈឺពោះ ឬការកន្ត្រាក់ស្បូនក្រោយពេលរួមភេទគឺជារឿងធម្មតា ប៉ុន្តែប្រសិនបើចលនានេះបន្តជាច្រើននាទី មានការឈឺចាប់យូរ ឬការហូរឈាមជាដើម ស្ត្រីគួរប្រញាប់ទៅមន្ទីរពេទ្យពិនិត្យភ្លាម។
ការរួមភេទពេលមានគភ៌គួរតែពិភាក្សាជាមួយដៃគូដើម្បីជ្រើសរើសយក អ្វីដែលល្អសម្រាប់ភាគីទាំងសងខាង គួបផ្សំជាមួយការផ្ដល់ភ្លើងខៀវពីសំណាក់គ្រូពេទ្យផងដែរ៕