ក្រុមហ៊ុន Google បានប្រកាសកាលពីថ្ងៃចន្ទពីការរៀបចំរចនាសម្ព័ន្ធរបស់ខ្លួនឡើងវិញ ដោយបង្កើតអង្គភាពថ្មីមួយ មានឈ្មោះថា Alphabet ជំនួសឲ្យឈ្មោះ Google ហើយដែលក្រុមហ៊ុន Alphabet នេះ នឹងក្លាយទៅជាក្រុមហ៊ុនមេ គ្របដណ្តប់លើសកម្មភាពរបស់សម្ព័ន្ធក្រុមហ៊ុន Google ទាំងអស់ រួមទាំង ម៉ាស៊ីនស្វែងរកអ៊ីនធ័រនែតផង។
Alphabet នឹងជំនួសឲ្យក្រុមហ៊ុន Google ក្នុងនាមជាក្រុមហ៊ុនចុះបញ្ជីផ្សារមូលបត្រ ហើយភាគហ៊ុនទាំងអស់របស់ Google និងត្រូវផ្ទេរដោយស្វ័យប្រវត្តិទៅជាភាគហ៊ុនរបស់ក្រុមហ៊ុន Alphabet និងដែលរក្សាសិទិ្ធគ្រប់យ៉ាងដូចដើម។ ការប្រកាសពីការរៀបចំរចនាសម្ព័ន្ធថ្មីដ៏គួរឲ្យភ្ញាក់ផ្អើលរបស់Google នេះ បានទទួលការស្វាគមន៍ដោយ ភាគហ៊ុន Google បានកើន៧% ក្នុងតម្លៃដល់ទៅ៧០៨ដុល្លារ ក្នុងមួយភាគហ៊ុន។
នៅក្នុងរចនាសម្ព័ន្ធថ្មីនេះ ក្រុមហ៊ុនក្រោមស្លាក Google នឹងរក្សាសកម្មភាពដ៏សំខាន់នៃសម្ព័ន្ធGoogle ដូចជាការស្រាវជ្រាវតាមអ៊ីនធ័រនែត ការផ្សព្វផ្សាយពាណិជ្ជកម្ម ផែនទី កម្មវិធី Applications ប្រព័ន្ធប្រតិបត្តិការ Android YouTube និងហេដ្ឋារចនាសម្ព័ន្ធបច្ចេកទេស។
ចំណែកក្រុមហ៊ុនបុត្រសម្ព័ន្ធមួយចំនួនទៀតដូចជាក្រុមហ៊ុន Nest ជាក្រុមហ៊ុនផលិតទែម៉ូស្តាតភ្ជាប់ បណ្តាញWi-fi ក៏ដូចជាមន្ទីរពិសោធន៍ជីវបច្ចេកវិទ្យា Calico ស្រាវជ្រាវលើការរស់បានយូររបស់មនុស្ស នឹងត្រូវចាកចេញពីក្របខ័ណ្ឌនៃអតីតក្រុមហ៊ុន Google តែនឹងត្រូវឋិតនៅក្រោមស្លាករបស់ Alphabet ជាមួយនឹងក្រុមហ៊ុន Google ក្នុងរចនាសម្ព័ន្ធថ្មី។
លោក Larry Page សហស្ថាបនិកក្រុមហ៊ុន Google បច្ចុប្បន្នជាអគ្គនាយកសម្ព័ន្ធក្រុមហ៊ុន Google ហើយក៏នឹងក្លាយទៅជាអគ្គនាយកសម្ព័ន្ធក្រុមហ៊ុន Alphabet នោះ បានសរសេរនៅក្នុងប្លុករបស់ខ្លួនថា៖ ក្រុមហ៊ុន Alphabet គឺជាបណ្តុំឬសម្ព័ន្ធនៃសហគ្រាសក្រុមហ៊ុន ជាច្រើន។ តែក្រុមហ៊ុនដែល សំខាន់ជាងគេពិតណាស់គឺនៅតែជាក្រុមហ៊ុន Google។ ក្រុមហ៊ុន Google ក្នុងរចនាសម្ព័ន្ធថ្មី នឹងមានទំហំតូចជាងមុន ដោយសារថាក្រុមហ៊ុនទាំងឡាយណាដែលមានសកម្មភាព ឆ្ងាយពីផលិតផលដ៏សំខាន់ របស់ Google នៅលើអ៊ិនធ័រនែត ឥឡូវនេះត្រូវបានដាក់ឲ្យឋិតក្រោមស្លាកក្រុមហ៊ុនមេ Alphabet។ លោកបន្តថា៖ រចនាសម្ព័ន្ធថ្មីនេះនឹងអនុញ្ញាតឱ្យយើងរក្សាការយកចិត្តទុកដាក់ដ៏ធំមួយ ដើម្បីជាឱកាសដ៏ធំធេងដែលយើង មាននៅក្នុងក្រុមហ៊ុន Google។
លោកក៏ បានគូសបញ្ជាក់ថា រចនាសម្ព័ន្ធថ្មីរបស់ Google ក្រោមស្លាកសម្ព័ន្ធក្រុមហ៊ុនមេ Alphabet នឹងចូលជាធរមាននៅចុងឆ្នាំ២០១៥នេះ ដែលនៅពេលនោះ លោក Sundar Pichai បច្ចុប្បន្នជាអនុប្រធានផ្នែកខាងផលិតផលរបស់ Google នឹងក្លាយជាអគ្គនាយកថ្មីរបស់ Google ចំណែកនាយកនានា របស់ Google បច្ចុប្បន្ន នឹងត្រូវបញ្ចូលក្នុងរចនាសម្ធ័ន្ធគ្រប់គ្រងថ្មីរបស់ក្រុមហ៊ុនមេ Alphabet។ ជាអាទិ៍ លោក Sergey Brin សហស្ថាបនិកក្រុមហ៊ុនម្នាក់ទៀតរបស់ Google នឹងក្លាយជាប្រធានក្រុមហ៊ុន Alphabet ឯលោក Eric Schmidt នឹងក្លាយជាប្រធានប្រតិបត្តិរបស់ Alphabet៕