កម្ពុជានឹងសាងសងផ្លូវ Express Way ដែលជាគម្រោងផ្លូវល្បឿនលឿនដំបូង នៅកម្ពុជា មានចម្ងាយផ្លូវប្រមាណ ២៧៥គីឡូម៉ែត្រ ទទឹងជាង ២០ម៉ែត្រ ពីភ្នំពេញ ទៅខេត្តព្រះសីហនុ ឆ្លងកាត់តាមខេត្តកំពត ដែលនឹងសាងសង់ដោយក្រុមហ៊ុន Global Cam Project Development PLC. របស់កម្ពុជា និងក្រុមហ៊ុន Green Eco Enegry co.,ltd របស់ប្រទេសកូរ៉េ គ្រោងនឹងចំណាយទឹកប្រាក់ប្រមាណ ៥៤០លានដុល្លារអាមេរិក ដោយគម្រោងនេះត្រូវបានចុះ MOU កាលពីថ្ងៃទី ២០ ខែវិច្ឆិកា ឆ្នាំ ២០១៥ នៅសណ្ឋាគារសុខាភ្នំពេញ។
គម្រោងសាងសង់ផ្លូវល្បឿនលឿននេះ មិនទាន់អាចដឹងពីកាលបរិច្ឆេទចាប់ផ្ដើម នៅពេលណានោះទេ ដោយក្រុមហ៊ុនទាំងពីរកំពុងសិក្សាលម្អិត ទាំងផ្នែកបច្ចេកទេស និងផ្នែកសង្គម គឺមើលទៅលើការប៉ះពាល់រយៈពេល ៦ខែ បន្ទាប់មកទើបអាចកំណត់ប្លង់បច្ចេកទេសលម្អិត ព្រមទាំងផែនការមេ សកម្មភាពជាក់ស្ដែង រួមទាំងតម្លៃច្បាស់លាស់ ហើយការសាងសង់នេះ អាចប្រើពេលយ៉ាងតិច ៣ឆ្នាំ។
ជាក់ស្ដែងនៅតាមបណ្ដោយផ្លូវជាតិលេខ ៤ ពីភ្នំពេញ ទៅកំពង់សោម មានចរាចរទៅមករាល់ថ្ងៃ ពេលខ្លះក៏មានកកស្ទះព្រោះតែឡានដឹកទំនិញធំៗផងដែរ ដូច្នេះការបង្កើតផ្លូវ Express Wayនេះ វានឹងផ្ដល់នូវគុណប្រយោជន៍ និងផលចំណេញសម្រាប់កម្ពុជារួមមាន៖
ចំណេញពេលវេលា
លោកអ្នកអាចធ្វើដំណើរតាម Express Way នេះដោយមិនចាំបាច់ព្រួយការកកស្ទះដោយឡានធំៗ និងថែមទាំងចំណេញវេលា ព្រោះថាការធ្វើដំណើរតាមផ្លូវនេះ លោកអ្នកអាចបើកបរដោយល្បឿនលឿន និងមានតែផ្លូវឯកទិសប៉ុណ្ណោះ។
កាត់បន្ថយគ្រោះថ្នាក់ចរាចរណ៍
នៅពេលដែលធ្វើដំណើរតាមផ្លូវជាតិលេខ ៤ រថយន្តតូច ធំទាំងអស់បើកបរក្នុងល្បឿនលឿន និងវារប្រជែងគ្នា ដែលអាចបង្កឲ្យមានគ្រោះថ្នាក់ចរាចរ ហើយការសាងសង់ផ្លូវនេះ នឹងជួយកាត់បន្ថយបញ្ហាគ្រោះថ្នាក់ចរាចរបានច្រើនផងដែរ។
កំពង់សោម ជាតំបន់សេដ្ឋកិច្ចដ៏សំខាន់
កំពង់សោម ជាទីក្រុងសេដ្ឋកិច្ចមួយដ៏សំខាន់សម្រាប់កម្ពុជា ព្រោះថាតំបន់សេដ្ឋកិច្ចមួយនេះ បានផ្ដល់នូវការងារច្រើន ដល់ប្រជាជនក្នុងតំបន់ ជាតំបន់ទេសចរណ៍គ្មានផ្សែង និងជាពិសេស គឺជាកំពង់ផែមួយដ៏សំខាន់ថែមទៀត។ ទន្ទឹមនឹងនេះ ក្នុងមួយឆ្នាំៗ ក្រុងព្រះសីហនុបានស្រូបយកភ្ញៀវទេសចរជាតិ និងអន្តរជាតិរាប់លាននាក់មកកម្ពុជា៕