ក្រុមហ៊ុនទូរគមនាគមន៍កម្ពុជាកំពុងប្រកួតប្រជែងគ្នាដើម្បីបោះជំហានទៅរកប្រព័ន្ធ 4G ពេលដែលការប្រើប្រាស់អ៊ីនធឺណិតតាមទូរស័ព្ទចល័តកំពុងកើនឡើង។
ក្រុមហ៊ុន Smart ដែលជាក្រុមហ៊ុនទូរគមនាគមន៍ឈានមុខគេមួយនៅកម្ពុជាកាលពីសប្ដាហ៍មុនបានប្រកាសថាបណ្ដាញ 4G LTE របស់ខ្លួននៅពេលនេះត្រូវបានពង្រីកនៅទូទាំងប្រទេស។
លោក Thomas Hundt អគ្គនាយក Smart ដែលជាក្រុមហ៊ុនផ្ដល់សេវា 4G LTE តែមួយគត់បានថ្លែងថាការសម្រេចចិត្តពង្រីកបណ្ដាញអ៊ីនធឺណិតរបស់ខ្លួនដោយសារកត្តាជំរុញពីអតិថិជនទោះបីជាខេត្តតូចៗក៏ចង់បានអ៊ីនធឺណិតមានល្បឿនលឿនផងដែរ។
លោកបន្តថា ខណៈដែលបច្ចុប្បន្នអតិថិជន Smart ជាង១០ម៉ឺននាក់ក្នុងចំណោម ៧,៥ លាននាក់កំពុងប្រើប្រាស់ប្រព័ន្ធ 4G LTE ការវិនិយោគនឹងមានភាពចាំបាច់នៅក្នុងពេលអនាគត។ សេវា4G បន្ថែមសំឡេង និងសេវា3G ផ្ដល់អ៊ីនធឺណិតប្រេកង់ធំ ចំណែកឯប្រព័ន្ធ4G LTE គឺជាស្ដង់ដារគ្មានខ្សែសម្រាប់ការប្រើប្រាស់ល្បឿនលឿន។
លោកលើកឡើងថា៖ «ពិតហើយការវិនិយោគមានសារៈសំខាន់ ហើយនឹងមិនទទួលបានលទ្ធផលល្អនៅក្នុងរយៈពេលពីរបីខែនោះទេ។ ប៉ុន្តែប្រព័ន្ធ 4G LTE គឺជាបច្ចេកវិទ្យានៅពេលអនាគត ហើយយើងមើលឃើញតម្រូវការរបស់អតិថិជន ដូច្នេះយើងត្រូវត្រៀមខ្លួនដើម្បីវិនិយោគ»។
លោកថ្លែងថា អតិថិជនជាច្រើនចង់បានអ៊ីនធឺណិតមានល្បឿនលឿនលើទូរស័ព្ទរបស់ពួកគេនិងថាការធ្លាក់ចុះតម្លៃអាចឲ្យពួកគេប្រើប្រាស់ប្រព័ន្ធ 4G បាន ខណៈទូរស័ព្ទមានតម្លៃទាបនឹងបង្កើនចំនួនអ្នកប្រើប្រាស់។
លោកបញ្ជាក់ថា៖ «ខណៈតម្លៃសម្រាប់ប្រព័ន្ធ 4G LTE កាន់តែថោក ហើយបច្ចុប្បន្នទូរស័ព្ទមានតម្លៃទាបចាប់ពី១៦០ដុល្លារដល់ ១៧០ ដុល្លារ អតិថិជនកាន់តែច្រើនឡើងៗនឹងអាចរីករាយនឹងអ៊ីនធឺណិតទូរស័ព្ទចល័តលឿនបំផុតរបស់កម្ពុជា»។
ខណៈក្រុមហ៊ុនទូរគមនាគមន៍ធំ៣នៅកម្ពុជាមានដូចជា ក្រុមហ៊ុន Smart ក្រុមហ៊ុន Metfone និងក្រុមហ៊ុន Cellcard មានសេវា 2G និងសេវា 3G ក្រុមហ៊ុនចូលមកថ្មី និងមានមូលដ្ឋាននៅប្រទេសសិង្ហបុរីគឺក្រុមហ៊ុន South East Asia Telecom (Seatel) បានសម្រេចចិត្តផ្ដល់សេវា4G LTE ដោយផ្ទាល់។ ក្រុមហ៊ុននេះមានវត្តមាននៅកម្ពុជាអស់រយៈពេលមួយឆ្នាំហើយ ដែលនឹងចាប់ផ្ដើមដំណើរការសេវាក្នុងរយៈពេលពីរបីខែក្រោយនេះ។
លោក Wei Xiang ប្រធានប្រតិបត្តិផ្នែកសាធារណៈ និងផែនការនៅក្រុមហ៊ុន Seatel បានថ្លែងថា៖ «យើងនឹងដំណើរការប្រព័ន្ធ 4G ១០០ ភាគរយ»។
លោកបានបន្ថែមថា ប្រព័ន្ធ 4G ត្រូវបានរំពឹងថានឹងផ្លាស់ប្តូរទីផ្សារទូរគមនាគមន៍កម្ពុជា តាមរយៈការផ្ដល់សេវាមានគុណភាពខ្ពស់សម្រាប់អ្នកចំណូលថ្មីដូចជាក្រុមហ៊ុន Seatel ដែលអាចប្រកួតប្រជែងជាមួយក្រុមហ៊ុនដែលមានស្រាប់។
លោក Anthony Galliano អគ្គនាយក Dynamo Digital ដែលជាក្រុមហ៊ុនទីផ្សារប្រព័ន្ធព័ត៌មានសង្គមក្នុងស្រុកបានថ្លែងថា ការបន្ថែមប្រព័ន្ធ 4G មានសារៈសំខាន់ក្នុងការចាប់យកការប្រើប្រាស់មាតិកាប្រព័ន្ធផ្សព្វផ្សាយកម្រិតខ្ពស់របស់កម្ពុជាលើទូរស័ព្ទចល័ត។
លោកថ្លែងថា៖«ក្រុមហ៊ុនទូរគមនាគមន៍ណាដែលចង់ស្ថិតនៅក្នុងការប្រកួតប្រជែងនេះនឹងចាំបាច់ត្រូវផ្ដល់សេវា 4G និងត្រូវតែសម្លឹងឆ្ពោះទៅមុខដើម្បីចាប់ផ្ដើមដំណើរការប្រព័ន្ធ 5G។ អតិថិជនរបស់ពួកគេស្ថិតនៅលើការផ្លាស់ប្តូរនិងទូរស័ព្ទចល័ត»។
លោកបានបន្តថា៖ «នៅពេលនេះអតិថិជនជាច្រើនមានទូរស័ព្ទចល័តប្រើប្រាស់នៅក្នុងការរស់នៅដែលរួមមានការងារ និងការកម្សាន្ត ហើយទម្លាប់លេងអ៊ីនធឺណិតរបស់ពួកគេកំពុងទាមទារល្បឿនអ៊ីនធឺណិតមានល្បឿនកាន់តែលឿនដើម្បីមើលវីដេអូ និងចម្លងរូបភាព»៕
