កាសែតអន្តរជាតិធំៗ រួមមានទាំង The Guardian, Independent បានចាប់អារម្មណ៍យ៉ាងខ្លាំងលើបង្គន់តម្លៃជាង៤ម៉ឺនដុល្លារដែលត្រូវបានសាងសង់សម្រាប់ទទួលដំណើរព្រះអង្គម្ចាស់ក្សត្រីយ៍ មហាចក្រី សិរិនថន នៅខេត្តរតនគីរី ភាគឦសាននៃកម្ពុជា។ បង្គន់ប្រណិតនេះសាងសង់ឡើងនៅក្បែរបឹងយក្សឡោម ដែលជាតំបន់ទេសចរណ៍ល្បីល្បាញមួយ។
បើតាម the guardian បង្គន់នេះមានទំហំ៨ម៉ែតការ៉េ ប្រក់ដោយក្បឿងពណ៌ស និងបំពាក់ម៉ាស៊ីនត្រជាក់។ ក្រុមហ៊ុនសំណង់ថៃ SCG បានទទួលខុសត្រូវសាងសង់ដោយចំណាយពេលសាងសង់រយៈពេលអស់១៩ថ្ងៃ។ បង្គន់នោះគឺធ្វើថ្វាយសម្រាប់តែព្រះអង្គម្ចាស់ក្សត្រីយ៍ ដែលនឹងគង់សម្រាកនៅទីនោះ។
សូមបញ្ជាក់ថា ព្រះអង្គម្ចាស់ក្សត្រីយ៍ថៃ មហាចក្រី សិរិនថន យាងបំពេញព្រះរាជទស្សនកិច្ច៣ថ្ងៃនៅក្នុងប្រទេសកម្ពុជាចាប់ពីថ្ងៃទី២២ដល់ថ្ងៃទី២៤កុម្ភៈនេះ។ ព្រះអង្គម្ចាស់ក្សត្រីយ៍នឹងយាងសម្ពោធសមិទ្ធផលមួយចំនួនក្នុងវិស័យអប់រំ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ព្រះអង្គម្ចាស់ក្សត្រីយ៍ក៏នឹងយាងប្រគល់អគារប្រើប្រាស់ថាមពលពន្លឺព្រះអាទិត្យនៅវិទ្យាល័យកំពង់ឈើទាលក្នុងខេត្តកំពង់ធំ ជូនលោក ហង់ជួន ណារ៉ុន រដ្ឋមន្ត្រីក្រសួងអប់រំផងដែរ។ ក្រៅពីនេះ ព្រះអង្គម្ចាស់ក្សត្រីយ៍ ក៏នឹងយាងចូលរួមក្នុងព្រះរាជពិធីសម្ពោធមណ្ឌលសុខភាពនៅខេត្តរតនៈគិរី និងស្លាកឈ្មោះថ្មីនៃវិទ្យាស្ថានបច្ចេកវិទ្យាកំពង់ឈើទាលនៅក្នុងខេត្តកំពង់ធំដូចគ្នា។
បើតាមការសេចក្តីប្រកាសព័ត៌មានដដែល បន្ថែមថាព្រះអង្គម្ចាស់ក្សត្រីយ៍ក៏នឹងយាងទតសាលាបឋមសិក្សាមួយចំនួននៅតាមខេត្តនានាដែរ៕