ក្លាយជាអ្នកមានទ្រព្យនៅវ័យ ៣០ឆ្នាំ គឺជារឿងដែលអាចទៅរួច និងមិនចាំបាច់ដល់ ត្រូវរកអ្វីដែលថ្មីបន្ទាប់ពី Facebook ឬ Snapchat ឬឈ្នះឆ្នោត អ្វីនោះទេ។ ខាងក្រោមនេះគឺជា ៩ចំនុច ដែលដកស្រង់ចេញពី បទពិសោធន៍និង ដំបូន្មានរបស់ អ្នកមានទ្រព្យសម្បត្ដិរាប់លាន ដែលពួកគេមាន អាយុនៅវ័យក្មេងនៅឡើយ៖
- ផ្ដោតទៅលើការរកចំនូល៖ នេះបើតាមការសរសេររបស់លោក Grant Cardone ដែលធ្លាប់គ្មានលុយមួយរៀល និងជំពាក់បំណុលកាលពីវ័យ ២១ឆ្នាំ ហើយក្លាយជាអ្នកមានទ្រព្យ នៅអាយុ ៣០ឆ្នាំ បានឲ្យដឹងថា៖ ជំហានដំបូង ក្នុងការក្លាយជាអ្នកមាន គឺត្រូវផ្ដោតទៅលើការ បង្កើននូវប្រាក់ចំនូល និងព្យាយាមធ្វើវាម្ដងហើយម្ដងទៀត។ ដូចជា ប្រាក់ចំនូលដំបូងរបស់គាត់ គឺ ៣,០០០ដុល្លារក្នុងមួយខែ និង ៩ឆ្នាំក្រោយមក ក៏ឡើងមកជា ២០,០០០ ដុល្លារក្នុងមួយខែ ព្យាយាមដើរតាមលុយ នោះវានឹងឲ្យអ្នកផ្ដោតទៅលើការ គ្រប់គ្រងនៃប្រាក់ចំនូល និងអាចប្រទះឃើញ ឱកាស ដើម្បីបង្កើនប្រាក់ផងដែរ។
- សន្សំដើម្បីវិនិយោគ មិនមែនសន្សំដើម្បីសន្សំ៖ ហេតុផលតែមួយគត់នៃការសន្សំលុយ គឺយកវាទៅវិនិយោគ។ គួរណាដាក់ប្រាក់ ដែលអ្នកសន្សំនេះ ដាក់ឲ្យដាច់ពីគណីយផ្សេងៗ ដែលអ្នកត្រូវចាយវាយជាប្រចាំ ទាំងករណីប្រើសម្រាប់ពេលបន្ទាន់។ នេះគឺជាជំហានទីមួយ ដែលអាចធ្វើឲ្យអ្នក ផ្ដោតអារម្មណ៍ ក្នុងការបង្កើនប្រាក់ចំនូល។
- សុំជំនួយពីអ្នកដទៃ៖ លោក Daniel Ally ដែលក្លាយជាអ្នកមានទ្រព្យនៅអាយុ ២៤ឆ្នាំ បានសរសេរថា៖ចំនុចសំខាន់ ក្នុងមុខជំនួញរបស់គាត់ គឺប្រសិនជាមិនបានជួល បុគ្គលិកដ៏សំខាន់ៗ នោះជំនួញរបស់គាត់ មិនអាចធំរីកលូតលាស់ទៅមុខទេ។ ដំបូងឡើងគាត់ពិតជាពិបាក ក្នុងការបង់ប្រាក់ខែ ទៅលើ មេធាវី , នាយកនិពន្ធ, អ្នកបង្វឹកហាត់ការងារផ្ទាល់ខ្លួន , ចុងភៅក្រៅម៉ោង និងអ្នកដទៃផ្សេងៗទៀត តែអ្វីទាំងនេះបែរជាជំរុញគាត់ ឲ្យក្លាយជាអ្នកមានទ្រព្យ។ យ៉ាងណាមិញ មានមនុស្សជាច្រើន មិនចង់សុំជំនួយពីអ្នកដទៃនោះទេ ដោយសារតែពួកគេ មានគំនិតនិយមផ្ទាល់ខ្លួនសម្រាប់ផ្លូវ ដែលពួកគេដើរ។
- ការសម្រេចចិត្ដ៖ លោក Tucker Hughes ដែលក្លាយជាអ្នកមានទ្រព្យ នៅអាយុ ២២ឆ្នាំ បានបង្ហាញឲ្យដឹងថា៖ ជៀសវាងការស្ទាក់ស្ទើរក្នុងការសម្រេចចិត្ដ តែត្រូវរក្សាទុកថាមពលខួរក្បាលរបស់អ្នក តាមរយៈធ្វើការសម្រេចចិត្ដបែបលឿនៗ កុំបង្អង់យូរ និងរៀបចំផែនការនៃ សកម្មភាពប្រចាំថ្ងៃរបស់អ្នកឡើងវិញ យ៉ាងឆាប់រហ័ស បែបនេះអ្នកនឹងអនុវត្ដកិច្ចការទាំងឡាយ ដោយសាមញ្ញ និងងាយស្រួល។ ដូចជា គាត់ដឹងថា គាត់ត្រូវស្លៀកពាក់អ្វី និងត្រូវញ៉ាំអាហារអ្វី នៅពេលព្រឹក ចុះអ្នកវិញ?
- កុំបង្អួត៖ លោក Grant Cardone បានសរសេរថា៖ គាត់មិនដែលទិញរថយន្ដស៊េរីទំនើបបើកនោះទេ ទោះបីជា គាត់អាចរកប្រាក់ចំនូលជាច្រើនពី មុខជំនួញគាត់ក៏ដោយ គាត់នៅតែបើករថយន្ដ Toyota Camry ដដែល។ ត្រូវឲ្យគេស្គាល់អ្នក តាមរយៈការខំប្រឹងពីការងារអ្នក មិនមែនទៅលើ គ្រឿងអលង្ការកំប៉ិកកំប៉ុក ឬសំភារៈនិយមនោះទេ។
- វិនិយោគលើខ្លួនឯង៖ មានន័យថា អ្នកគួរតែចំណាយពេល យ៉ាងតិច ៣០នាទី ស្ដាប់ ឬអានសៀវភៅ ឬអត្ថបទព័ត៌មានជាប្រចាំថ្ងៃ ដើម្បីដឹងពីរឿងរ៉ាវផ្សេងៗដូចជា ហិរញ្ញវត្ថុ , នយោបាយ ឬ កីឡាជាដើម ដែលទោះជា អ្នកមិនអាចក្លាយជាអ្នកជំនាញ ឬពូកែទៅលើរឿងទាំងនោះក្ដី។ នាសម័យថ្មីនេះ ភាពជោគជ័យ និងអ្នកមានទ្រព្យសម្បត្ដិភាគច្រើន គឺបានមកពីការអាន និងស្រាវជ្រាវ ឧទាហរណ៍ដូចជា លោក Warren Buffett ដែលជាអ្នកមានប្រាក់វាល់លាន ត្រូវបានគេប៉ាន់ស្មានថា គាត់ចំណាយ ៨០ភាគរយនៃការងារ ទៅលើការអាន។
- ទទួលស្គាល់នៅពេលដែលប្រឈមមុខនឹង ហានិភ័យ និងត្រួវធ្វើសកម្មភាពលើវា៖ អ្នកមិនអាចក្លាយ ជាអ្នកមានទ្រព្យ ប្រសិនជាមានក្ដីសង្ឃឹមទាបនោះទេ ខណៈដែលអ្នកមានទ្រព្យ និងមនុស្សជោគជ័យភាគច្រើន តែងតែគិតអ្វីដែលធំ និងលេងក៏ធំដូចគ្នា។ បែបនេះមានន័យថា ហានិភ័យជាច្រើន ក៏ត្រូវជួបប្រទះផងដែរ ប្រសិនជាអ្នកអាចដោះស្រាយ និងប្រឈមមុខនឹងវាបាននោះ អ្នកនឹងទទួលបានអ្វី ដែលអ្នកសមនឹងទទួល មកវិញ។
- ត្រូវចេះសហការជាមួយនឹងអ្នកដទៃ និងមានជំនាញក្នុងការនិយាយ ដើម្បីដោះស្រាយរឿង តូចៗទាំងឡាយ៖ គ្មានអ្នកមានទ្រព្យណាម្នាក់ មិនចេះដឹង ក្នុងការដោះស្រាយជាមួយនឹង មនុស្សដែលពោរពេញដោយ កំហឹងនោះទេ។ អ្នកគួរតែរៀបចំខ្លួនទុកជាមុន នៅពេលដែលមិត្ដដ៏ល្អរបស់អ្នក ចូលមកនិយាយជាមួយអ្នកឬ ក្រុមគ្រួសារចំអកអ្នក ពេលខ្លះរឿងរ៉ាវទាំងនេះ អាចកើតឡើងដោយចៃដន្យ។
- ចង់បាន ១០លាន មិនមែន ១លាន៖ លោក Grant Cardone បាននិយាយឲ្យដឹងថា៖ កំហុសឆ្គងដ៏ធំក្នុងផ្នែក ហិរញ្ញវត្ថុ របស់លោក គឺគាត់មិនបានគិត ចង់បានប្រាក់ច្រើន។ គាត់សូមលើកទឹកចិត្ដ ដល់អ្នកទាំងអស់គ្នាឲ្យ ទៅរកប្រាក់ច្រើនជាង ១លាន ដោយសារតែប្រាក់នៅលើផែនដីនេះ មិនអាចរីងស្ងួត ឬខ្វះប្រាក់នោះទេ មានតែខ្វះមនុស្សទេដែលមិនបានគិតដល់ រឿងប្រាក់៕