ជំងឺកាមរោគឆ្លងតាមការរួមរ័ក ជាមួយអ្នកដែលមានផ្ទុកជំងឺដោយមិនបានប្រើប្រាស់ស្រោមអនាម័យ ឬប្រើប្រាស់មិនបានត្រឹមត្រូវនៅពេលរួមមេត្រី ហើយជំងឺនេះក៏អាចឆ្លងតាមរយៈការបញ្ចូលឈាម ប្រើម្ជុល សឺរាំងរួមគ្នាផងដែរ ។ រោគសញ្ញានៃជំងឺកាមរោគមានដូចជា ៖
-មានហូរខ្ទុះពីតម្រងនោម
-ពងទឹក ឬដំបៅលើប្រដាប់បន្តពូជ
-ដុះសាច់ដូចជាសិរមាន់លើប្រដាប់បន្តពូជ
-ហើមក្រលៀន
គ្រប់អ្នកជំងឺកាមរោគមិនមែនសុទ្ធតែមានរោគសញ្ញាទាំងអស់នោះទេ ព្រោះអ្នកខ្លះបានឆ្លងជំងឺកាមរោគតែគ្មានរោគសញ្ញាឡើយ ។ បើសិនជាលោកអ្នកដែលកើតមានជំងឺកាមរោគហើយមិនបានទៅធ្វើការព្យាបាលឬព្យាបាលមិនបានទាន់ពេលវេលា ឬក៏ព្យាបាលមិនបានត្រឹមត្រូវ ជំងឺកាមរោគអាចបង្កឱ្យមានផលវិបាកមួយចំនួនដូចជា ៖
-ងាយចម្លងជំងឺអេដស៍
-ត្បៀតបង្ហួរនោម
-កាត់ផ្តាច់មេជីវិតទាំងបុរសនិងស្ត្រី
ដូច្នេះនៅពេលដែលលោកអ្នកសង្ស័យថាកើតមានជំងឺកាមរោគ គួរតែស្វែងរកការព្យាបាលឱ្យបានទាន់ពេលវេលា ហើយការព្យាបាលជំងឺកាមរោគនេះមានច្រើនរបៀប ៖
-ត្រូវព្យាបាលទាំងដៃគូរួមភេទ
-លេបថ្នាំតាមការណែនាំរបស់គ្រូពេទ្យ
-ក្នុងកំឡុងពេលព្យាបាលត្រូវតមការរួមភេទ តែបើទ្រាំមិនបានត្រូវរួមរ័កដោយប្រើប្រាស់ស្រោមអនាម័យឱ្យបានត្រឹមត្រូវ
-អ្នកជំងឺគូរតែទៅពិនិត្យឈាមរកមើលមេរោគអេដស៍
-មិនត្រូវរួមភេទនៅពេលដែលមានជំងឺកាមរោគ ឬមិនទាន់ជាសះស្បើយឡើយ
-មិនត្រូវព្យាបាលដោយខ្លួនឯងទេ
យើងមិនដឹងថាមនុស្សណាម្នាក់មានផ្ទុកកាមរោគក្រៅពីការពិនិត្យឈាមនោះឡើយ។ មិនត្រូវទុកចិត្តនរណាម្នាក់ថាគ្មានកាមរោគឡើយក្រៅពីខ្លួនអ្នក ដូច្នេះបើសម្រេចចិត្តរួមភេទជាមួយអ្នកណាម្នាក់ត្រូវប្រើប្រាស់ស្រោមអនាម័យឱ្យបានត្រឹមត្រូវ ៕