តាមសេចក្តីរាយការណ៍បានឲ្យដឹងទៀតថា ដីកាសម្រេចដោះលែងឲ្យជនជាប់ចោទនៅក្រៅឃុំនោះ ចុះហត្ថលេខាដោយលោកម៉េង តូនី ចៅក្រមតុលាការក្រុងភ្នំពេញ ហើយសេចក្តីសម្រេចនេះត្រូវបានគេបញ្ជូនទៅកាន់ពន្ធនាគារដើម្បី អនុវត្តនៅថ្ងៃទី២០ ខែឧសភា។
ការដោះលែងបុរសជនជាតិវៀតណាមខាងលើដែលបើករថយន្តក្នុងស្ថានភាព ស្រវឹងបុករះចូលផ្ទះបើកឱសថស្ថានបណ្ដាលឲ្យស្លាប់ម្ចាស់ផ្ទះ និងរងរបួសអ្នកដំណើរម្នាក់ធ្វើឲ្យមន្ត្រីអនុរក្សពន្ធនាគារមានការ ភ្ញាក់ផ្អើល ហើយធ្វើការបរិហាររិះគន់ថា ករណីដោះលែងជនជាប់ចោទនៅក្នុងអំឡុងពេលនៃការស៊ើបអង្កេតនេះ បើពុំមានការឯកភាពពីព្រះរាជអាជ្ញាទេ នោះចៅក្រមស៊ើបសួរមិនអាចធ្វើឡើងបានតែម្នាក់ឡើយ។
ដូច្នេះសំណុំរឿងបង្កគ្រោះថ្នាក់ចរាចរណ៍បណ្ដាលឲ្យស្លាប់ជីវិត និងរងរបួសខូចខាតទ្រព្យសម្បត្តិនេះ គឺព្រះរាជអាជ្ញា និងចៅក្រមតុលាការឃុបឃិតគ្នាដោះលែងជនជាប់ចោទ។
គួររំលឹកថា កាលពីវេលាម៉ោង៦និង៣០នាទីព្រឹកថ្ងៃទី១១ ខែមេសា ឆ្នាំ២០១៥កន្លងទៅ មានរថយន្ត CRV ១គ្រឿង ពណ៌ស ពាក់ស្លាកលេខភ្នំពេញ 2AB-2642 បើកបរដោយជនជាតិវៀតណាមម្នាក់ឈ្មោះបាន ឌឿក ភេទប្រុស អាយុ៤០ឆ្នាំ មានទីលំនៅក្នុងភូមិបុរីពិភពថ្មី សង្កាត់ភ្នំពេញថ្មី ខណ្ឌសែនសុខ បានបុករះចូលផ្ទះបើកឱសថស្ថានយីហោ “ពោធិ៍មាស” មានទីតាំងនៅផ្ទះលេខ៥៨៣ ផ្លូវលេខ១០១៩ សង្កាត់ភ្នំពេញថ្មី ខណ្ឌសែនសុខ បណ្តាលឲ្យគ្រូពេទ្យម្នាក់ដែលជាម្ចាស់ផ្ទះបានស្លាប់ និងអ្នកដំណើរតាមផ្លូវម្នាក់ទៀតរងរបួសធ្ងន់ធ្ងរ។
នគរបាលខណ្ឌសែនសុខបានរាយការណ៍ឲ្យដឹងថា ជនរងគ្រោះដែលត្រូវបានស្លាប់នៅក្នុងគ្រោះថ្នាក់ដោយរថយន្តបុករះចូល ផ្ទះឈ្មោះអ៊ិត ផល ភេទប្រុស អាយុ៥៤ឆ្នាំ ជាម្ចាស់ឱសថស្ថាន និងមានមុខរបរជាគ្រូពេទ្យថ្នាក់ឱសថការីឧត្តម។ ចំណែកបុរសម្នាក់ទៀតរងរបួសធ្ងន់ធ្ងរឈ្មោះឈន រិទ្ធី អាយុ៤៦ឆ្នាំ ជាអ្នករត់ម៉ូតូឌុប។
ពាក់ព័ន្ធនឹងករណីនេះប្រភពព័ត៌មានពីកន្លែងកើតហេតុបានឲ្យដឹងថា នៅវេលាព្រឹកព្រលឹមលោកអ៊ិត ផល បានចេញមកបើកទ្វាររបងខាងមុខផ្ទះ ក៏ស្រាប់តែមានរថយន្ត CRV ពណ៌ស ដែលបើកបរដោយជនជាតិវៀតណាមឈ្មោះបាន ឌឿក បានបោះពួយយ៉ាងលឿនពីទិសខាងត្បូងបុករះខឿនចិញ្ចើមផ្លូវ ហើយបុកឈ្មោះឈន រិទ្ធី ដែលកំពុងអង្គុយលើម៉ូតូបណ្ដាលឲ្យប៉ើងទៅម្ខាងផ្លូវ ហើយរថយន្តក៏បុករះចូលមកមាត់ទ្វាររបងមុខផ្ទះដែលលោកអ៊ិតត ផល កំពុងបើកទ្វារបណ្តាលឲ្យប៉ើងជាង១០ម៉ែត្រពីកន្លែងកើតហេតុ ហើយជនរងគ្រោះបានស្លាប់ពេលបញ្ជូនដល់មន្ទីរពេទ្យ។
ភ្លាមៗនោះអ្នកដំណើរតាមផ្លូវរួមជាមួយនឹងក្រុមគ្រួសារជនរងគ្រោះ បានឃាត់ខ្លួនអ្នកបើកបររថយន្តឈ្មោះបាន ឌឿក ប្រគល់ឲ្យប៉ូលិសដើម្បីចាត់ការតាមច្បាប់។
រឿងក្តីនេះ តុលាការបានសម្រេចចោទប្រកាន់ និងឃុំខ្លួនលោកបាន ឌឿក បានតែ១ខែប៉ុណ្ណោះ ស្រាប់តែតុលាការបានសម្រេចចេញដីកាដោះលែងឲ្យជនជាប់ចោទមានសេរីភាព វិញ ដោយសំណុំរឿងនៅមិនទាន់បិទការស៊ើបសួរនៅឡើយ។