១- ប្រើពាក្យគ្រោងគ្រាតដាក់បុរស :
ទោះជាស្ត្រីនោះមានវោហារជំនាញ មុតមាំយ៉ាងណាក៏ដោយ ប៉ុន្តែ បើការប្រើពាក្យសម្តីមិនបានសមរម្យតាមពេលវេលា និងកាលៈទេសៈ វានឹងបង្ហាញនូវចំណុចខ្សោយរបស់ខ្លួនយ៉ាងច្បាស់ក្រឡែត។ ជាការពិត អ្នកណាក៏ចង់ស្តាប់ឮសម្តីពិរោះពិសាដែរ។ ហេតុនេះ ត្រូវចង់ចាំថា កាយវិការនិងសម្តីផ្អែម ទន់ត្រជាក់រឹតតែជួយឲ្យស្ត្រីឆក់យកបេះដូងបុរសដោយងាយស្រួលទៀតផង។ ដូច្នេះគួរចៀសវាងសម្តីទ្រគោះ បោះបោក ដែលធ្វើឲ្យគេយល់ថា អ្នកជាស្ត្រីមានស្នេហ៍ភ្លើងចំបើងតក់ក្រហល់ មិនអាចសេពគប់ជាដៃគូយូរអង្វែងបានទេ។
២- បញ្ហាទ្រព្យសម្បត្តិ ប្រាក់ចំណូល :
ចំណុចនេះ អាចចែកចេញច្រើនទៀត ស្ត្រីមួយចំនួនតែងចូលចិត្តលូកដៃរឿងលុយកាក់របស់បុរស ដូចជាការដាក់កំហឹងការចំណាយចាយវាយការរឹតត្បិតសន្សំសំចៃ ការចង់ដឹង ចង់ឮ ពីររឿងប្រាក់ខែ ប្រាក់ចំណូល ការរកស៊ីផ្សេងៗ និងកេរមតកជាដើម។ និយាយរួមទៅ ត្រូវគិតថា តើអ្នកទៅទាក់ទងចែចង់បុរស ព្រោះបំណងចង់រាប់អានគេ ឬមួយចង់ធ្វើជាអ្នកត្រួតពិនិត្យគណនី លុយកាក់របស់គេ? ហើយកុំយល់ថា អ្នកអាចបិទបាំងចរិតលោភលន់របស់ខ្លួនបានឲ្យសោះ ព្រោះបុរសអាចនឹងគិតយល់ ពីការសម្លឹងឃើញទឹកលុយរបស់ស្ត្រី ប្រៀបបាននឹងអ្វីដែលស្ត្រីគិតយល់ពីការលបលួចមានស្រីក្រៅរបស់គូស្នេហ៍ខ្លួនដូច្នោះដែរ។
៣- កាយវិការគួរឲ្យអស់សំណើច :
ការកែចរិក និងចេះកំប្លុកកំប្លែងតិចតួច អាចធ្វើឲ្យស្ត្រីកាន់តែមានមន្តស្នេហ៍ ទាក់ទាញជាងមុន ប៉ុន្តែ ទាំងនោះត្រូវមានដែនកំណត់ច្បាស់លាស់មួយ។ ឧទាហរណ៍យូរៗម្តង អ្នកដៀងកន្ទុយភ្នែក ដាក់គេម្តង ធ្វើឲ្យគេញ័របេះដូង។ល។ ប៉ុន្តែ កាយវិការដដែលនេះបើធ្វើចំពោះស្ត្រីភេទដូចគ្នាញឹកញាប់ពេក ប្រាកដជាបាត់អស់ភាពគួរឲ្យស្រលាញ់មិនខាន។ សរុបទៅទង្វើទាំងនោះ អាចនឹងធ្វើឲ្យបុរសរាប់រក។ ប៉ុន្តែទឹកចិត្តចង់រួមរស់សាងស្នេហ៍នឹងអ្នកប្រាកដជារលាយតាមខ្យល់អស់ ទោះបីជាអ្នក អាចទាក់ទាញគេ បានមួយរយៈមែន ប៉ុន្តែ នឹងមិនអាចថែគេទុកមួយជីវិតបានឡើយ។
៤- ជាស្ត្រីឆ្មើមខាងច្នៃប្រឌិត :
ស្ត្រីប្រកបដោយចរិយាល្អប្រពៃ គឺជាសិរីសួស្តីសម្រាប់ខ្លួនឯងប៉ុន្តែ បើដល់ថ្នាក់ចូលចិត្តគេចផ្ទះ ចេញដើរលេងខាងក្រៅញឹកញាប់ពេក អ្នកនឹងប្រែជាអាប់ឱន ពិសេស ការលើកតម្លៃខ្ពស់ពេក មានរបៀបរបពេកក៏អាចក្លាយជាមនុស្សគួរឲ្យជិនឆ្អន់បានដែរ។ ឧទាហរណ៍ ពេលទទួលទានអាហារជាមួយគូរស្នេហ៍អ្នកបញ្ចេញកាយវិកាសុភាពពេក សូម្បីតែទំពាបាយនិងអាហារ ការចាប់កាន់ចាន ស្លាបព្រា ថ្នមៗញើបៗ។ល។ ទាំងនេះ អាចធ្វើឲ្យអ្នកដែលចូលរួមជាមួយមានអារម្មណ៍ពិបាកទ្រាំ។ អាកប្បកិរិយាប្រពៃនេះហើយ ដែលនាំឲ្យគេយល់ថា អ្នកមិនទុកខ្លួនជាមនុស្សគ្នាឯង មិនស្និទ្ធស្នាល ពូកែប្រកាន់ខ្លួនហួសជាហេតុធ្វើឲ្យបុរសពិបាកនឹងរួមរស់ជាមួយ។
៥- ពូកែប្រចណ្ឌ :
បានន័យថា ចាប់តាំងពីចែចង់ស្គាល់ចិត្តថ្លើមគ្នាមក អ្នកបានធ្វើឲ្យបុរសនោះលែងមានសិទ្ធិនិយាយពីស្រីផ្សេង មិនអាចសម្លឹងមើល មិនអាចរិះគន់ ឬសូម្បីតែញញឹមដាក់ស្រីផ្សេងឡើយ ដោយចង់ធ្វើឲ្យលើលោកនេះ គេត្រូវតែមានអ្នកម្នាក់គត់ប៉ុណ្ណោះ។ ប៉ុន្តែជាធម្មតាបុរសៗមិនសូវមានទម្លាប់ចូលចិត្តដៃគូប្រចែប្រចណ្ឌស្រាប់ទេ។ ទោះយ៉ាងណា គេនឹងបន្ទន់ឥរិយាបថ ព្រោះទុកអ្នកជាគូសង្សារ គឺមានសិទ្ធិហូងហែងគេបានតាមការគួរជាពិសេស ក្នុងករណីដែលបុរសជាអ្នកផ្តើមចែចង់អ្នកមុន។ ប៉ុន្តែ នេះគឺខុសគ្នា ព្រោះស្ត្រីជាអ្នកសាងស្ពានស្នេហ៍ទៅរកបុរសមុនក្នុងស្ថានការណ៍នេះ គួរដឹងថា អ្នកកំពុងបំផ្លាញឱកាសល្អរបស់ខ្លួនឯងហើយ ព្រោះបើអ្នកបង្ហាញចរិកប្រចណ្ឌជ្រុលពេក គេអាចនឹងដាក់មេផាយចោលអ្នករហូតក៏ថាបាន៕